Според најновите податоци на Евростат од 31 јануари, само три држави во Европа имаат помала бруто минимална плата од Македонија, каде што од јули 2022 година таа е 359 евра.
Помалку им е загарантирана на вработените само во Босна и Херцеговина, Албанија и Косово. Во БиХ таа изнесува 300 евра, со тоа што во Федерацијата БиХ е 275, а во Република Српска 300. Албанските работници имаат загарантиран минималец од 298 евра, а косовските од 170, поточно од 130 до 170, зависно од староста.
Веднаш над Македонија во овој поглед е Бугарија со бруто минимална плата од 399 евра, потоа Србија со 460, Турција со 501, Црна Гора со 533, во Хрватска таа е 700 евра, во Грција 832, а во Словенија 1.203.
Неприкосновен европски лидер е Луксембург со 2.387 евра, пред Германија со 1.987, трета е Белгија со 1.955 итн.
