Само за три месеца Светска банка ја „скастри“ за една четвртина својата прогноза за растот на бруто домашниот производ на Македонија годинава, сведувајќи го на 1,8 проценти, што е за 0,6 процентни поени помалку од нејзината јунска проекција.
„Растот во 2023 година се очекува скромно да се зголеми за 1,8 отсто, како одраз на забавувањето на надворешната побарувачка и на постојаната криза со трошоците на животот, делумно неутрализирана од влијанието на изградбата на автопатот“, соопшти Светската банка во есенското издание од нејзиниот ажуриран извештај за економските движења во Европа и во Централна Азија.
Зголемените јавни инвестиции, обновената потрошувачка и извозот треба да доведат до умерено забрзување на економскиот раст на Македонија до 2,5 проценти во 2024 година и 2,9 отсто во 2025 година.
Извештајот укажува дека годишната инфлација во државава ќе остане висока и ќе изнесува 9,1 отсто во 2023 година, пред да се намали на долгорочниот просек од 2 отсто до 2025 година.
Напредок во преговорите за пристап во ЕУ може да ги забрза критичните реформи и да го отклучи растот, но зголемената политичка несигурност и продолжениот парламентарен ќорсокак поради немањето консензус за уставните измени и претстојните избори може да го одложат спроведувањето на реформите, додава глобалниот кредитор.
Понатаму, отстапувањата од политичките практики може да ја загрозат фискалната одржливост и опстојувањето на инфлацијата за возврат да бара дополнително монетарно затегнување, што може уште повеќе да ги ограничи опциите за финансирање и да ја забави економската активност понатаму, се вели во извештајот.
