Зеленски однесе бивш нацист во Канада – Полска бара да биде „испорачан“

Полскиот министер за образование, Пшемислав Чарнек, вчера изјави дека „презел чекори“ за екстрадиција на Јарослав Хунка, 98-годишниот украински нацистички ветеран, кој минатата недела беше почестен од канадските парламентарци.

За време на посетата на украинскиот претседател Володимир Зеленски на Канада минатиот петок, претседателот на Претставничкиот дом Ентони Рота го претстави Хунка како канадско-украински воен херој, предизвикувајќи бурни овации од парламентарците.

„Со оглед на скандалозните настани во канадскиот парламент, кои вклучуваа и оддавање почест, во присуство на претседателот Зеленски, на член на злосторничка нацистичка формација, презедов чекори кон евентуална екстрадиција на овој човек во Полска“, напиша Чарнек на платформата X (поранешен Твитер).

Во писмото до полскиот Институт за национално сеќавање, тело кое ги истражува минатите злосторства против полската нација, Чарнек побара „итна истрага“ за тоа дали Хунка се бара за злосторства против Полјаците со еврејско потекло.

Тој додаде дека потенцијалните „знаци за такви злосторства се основа за поднесување барање до Канада за негова екстрадиција“.

Канадскиот премиер Џастин Трудо изјави за медиумите дека ситуацијата е „екстремно вознемирувачка“ и „длабоко засрамувачка“ за Канада. Оттогаш Рота се извини и рече дека ја презема „целосната одговорност“ за инцидентот и дека поднесува оставка од својата функција.