Тревор Рид, поранешен американски маринец кој беше приведен во Русија пред да биде ослободен во размена на затвореници минатата година, беше повреден за време на борбите во Украина, соопшти Стејт департментот.
„Господинот Рид не беше ангажиран во никакви активности во име на американската влада“, рече портпаролот на Стејт департментот, Ведант Пател.
Пател рече дека Владата не ни знаела за плановите на Рид да ја посети Украина. Тој додаде дека Рид бил пренесен во Германија за медицинска нега со помош на невладина организација.
Стејт департментот постојано ги предупредува Американците да не патуваат во Украина и да не учествуваат во борбите.
Рид беше уапсен во Москва во летото 2019 година поради пијанство, а во јули 2020 година беше осуден на девет години затвор за загрозување на „животот и здравјето“ при напад врз руски полицајци. Тој и неговото семејство ги отфрлија обвинувањата, а Стејт департментот го означи како незаконски приведен.
Неговото ослободување од руски затвор во април 2022 година следеше по неколкумесечни напори на американската влада, рекоа официјални лица, и беше особено итно со оглед на загриженоста за здравјето на Рид.
Неговото ослободување на крајот беше обезбедено со размена на затвореници за рускиот државјанин Константин Јарошенко, руски шверцер осуден за заговор за увоз на кокаин.
