Против 47-годишник за кого постои основано сомневање дека сторил кривично дело – разбојништво , Основното јавно обвинителство Скопје донесе Наредба за спроведување истражна постапка.
На 4 септември, осомничениот влегол во маркет на булеварот „АСНОМ“ и веднаш се упатил во просторот кај касата и ја отворил. Сопственичката на продавницата, која работела и како продавач, му се спротивставила, но тој извадил нож со кој и се заканил, ја оттурнал и од касата одзел 16.300 денари колку што имало во тој момент.
Сопственичката на продавницата излегла од продавницата и ја затворила вратата, обидувајќи се да го задржи во продавницата, но тој со сила ја турнал вратата, успеал да ја отвори и избегал од местото.
За осомничениот разбојник јавниот обвинител до судијата на претходна постапка од Основниот кривичен суд Скопје достави предлог за определување мерка притвор.
