Директорот на канцеларијата за надворешни односи на Комунистичката партија на Кина, Ванг Ји, кој се смета за највисок кинески дипломат, изјави во Москва дека односите меѓу Кина и Русија се „цврсти како камен“, способни да издржат каков било тест на меѓународната политичка арена.
За време на разговорот со Николај Патрушев, секретар на Советот за безбедност на Руската Федерација и еден од најблиските соработници на рускиот претседател Владимир Путин, Ванг Ји изјавил дека кинеско-руските односи „немаат граници“, пренесува Ројтерс.
„Кинеско-руските односи се зрели и цврсти, способни да го издржат секој тест на променливата меѓународна арена“, му рече Ванг на Патрушев.
Кинескиот дипломат изрази уверување дека Русија и Кина треба да разработат нови заеднички чекори за понатамошно осигурување на безбедноста на двете земји.
Патрушев му рекол на Ванг дека Пекинг е главен приоритет на руската надворешна политика и оти двете земји мора да застанат заедно против Западот.
„Волстрит џурнал“, повикувајќи се на добро информирани извори, претходно објави дека кинескиот претседател Си Џинпинг планира да ја посети Москва и да се сретне со рускиот претседател Владимир Путин во наредните месеци.
Американскиот весник наведува дека средбата на Си со Путин ќе биде дел од напорите за започнување мировни преговори за Украина, како и да му се овозможи да ги повтори своите повици да не се користи нуклеарно оружје, пренесе Ројтерс.
