„Tрикафта“ ќе почнат да примаат веќе од утре, но само 8 пациенти со цистична фиброза, останатите ќе почекаат

Ова е првата фаза со која почнува терапијата со лекот „Трикафта“ за најтешко болните пациенти од реткото хроничнo заболување цистична фиброза. Едно дете и седум возрасни пациенти веќе од утре ќе почнат да го примаат лекот кој од денеска веќе е на Клиниката за детски болести.

Лекот од утринава веќе е пристигнат на Клиниката, и веќе ги примаме пациентите кои треба да почнат со терапијата. На Детската клиника ќе примиме шест пациенти, а двајца ќе се водат на Клиниката за пулмологија. Очекуваме дека овие денови ќе почнат да ја примаат терапијата, некои од утре и секако очекуваме позитивен ефект во однос на подобрување на нивната белодробна функција, во однос на подобрување на нивниот квалитет на живот, нутритивниот статус, намалена  потреба од хоспитализација и секако поактивен живот на овие пациенти. Она што можам да кажам дека од овие осум пациенти кои први ќе пончат да го примаат лекот „Трикафта, двајца се во навистина критична состојба и тие ќе бидат третирани на Клиниката за пулмологија, и кај нив е неизвесен ефектото од терапијата, но секако ќе се обидеме да им ја подобриме белодробната функција која е основна за нивниот квалитет на живот. Инаку добивме пониска цена за овој лек, заради што во првата фаза на примање на лекот дадовме предлог да вклучиме уште четири пациенти, изјави денеска директорката на Клиниката за детски болести, проф. д-р Стојка Нацева Фуштиќ.

Станува збор за едногодишна таблетарна терапија која пациентите ќе ја подигнуваат еднаш месечно од Клиниката за детски болести. Наутро се пијат две таблети од еден комбиниран модулатор и една таблета навечер.

  • Тоа е терапија која ќе си ја примаат дома и не се врзани со хоспитализација, додаде проф. д-р Фуштиќ.