Портпаролот на ВМРО-ДПМНЕ Наум Стоилковски вели дека во позадина на хаосот во Скопје, долговите и девастирањето на градските претпријатија стојат провизии од мрсни, богати тендери и договори без рабат, и истовремено се сомнева дека градскиот превоз во Скопје,наводно, ќе го преземе бугарска фирма.
„Време е да се отворат картите, време е за вистински одговори“, вели Стоилковски и прашува:
Дали нема попуст од милионскиот договор за нафта за ЈСП со фирма на пратеник од власта, затоа што има провизии кои се договорени да завршат во приватни џебови?
Дали е точно дека зад сите матни зделки на Град Скопје стои Драги Митковски познат како Драги Книга?
Дали сметководителот од Ѓорче Петров од заднина управува со ЈСП за провизии?
Дали заедно со него и прв соработник во договарањето на провизиите од матните зделки е близок роднина на Данела Арсовска.
Но и, дали зад тргањето на приватните превозници стои желбата превозот во Скопје да го преземе приватна фирма од Бугарија за која инсистира владата на Ковачевски?
Дали на средбата Арсовска – Ковачевски било договарана оваа компанија од град близу Софија да биде единствен приватен превозник во град Скопје?
Стоилковски додава дека „во моментот власт во Скопје се директорите на јавните претпријатија кои доаѓаат од СДСМ, од ДУИ и од Левица под патронат на Ковачевски и Арсовска.
Стотици луѓе немаат леб на маса, градот тоне во долгови, но затоа има огромни провизии!
Скопје не може да издржи уште еден криминоген и неспособен градоначалник!, порача Стоилковски.
