Министерството за транспорт и врски го поништило решението на градоначалникот на Охрид Кирил Пецаков со кое беше стопирана градбата на контроверзниот хотел во Лагадин кој се гради на десетина метри од брегот на Охридското езеро.
Порталот ohrid1.com јавува дека второстепената комисија при Министерството за транспорт и врски која одлучува по жалби, во врска со жалбата доставена од инвеститорот на хотелот во Лагадин, одлучила мериторно, односно го поништила решението со кое градоначалникот Кирил Пецаков го огласи за ништовно одобрението за градба на хотелот во Лагадин.
Тоа значи дека Министерството за транспорт и врски ја трга единствената препрека за градба на спорниот хотел во Лагадин кој има влијание на одлуката Охрид да го загуби статусот на заштитен град од УНЕСКО.
Ваква одлука претставува своевиден преседан, дотолку повеќе што во пракса секогаш второстепената комисија носела решенија за повторно одлучување од страна на првостепениот орган. Во овој случај не само што такво решение нема, туку Министерството за транспорт и врски донесеното решение на 01.03.2023 година го прави правосилно. Со ваквата одлука на Министерството за транспорт и врски на инвеститорот му се отвора врата за непречено продолжување со градба на спорниот хотел. Од кои причини и од кои побуди Министерството за транспорт и врски носи ваква мериторна одлука и ја прогласува за правосилна, без претходно да го врати предметот на повторно одлучување останува нејасно. После ваквата одлука во јавноста провејуваат информации дека тоа се должи на јавното ветување кое поранешниот премер Зоран Заев на партиска трибина во Охрид директно пред јавноста му вети на инвеститорот дека самиот ќе се заложи за да му се обезбедат услови за продолжување со градење, пишува Охрид1.
Порталот потсетува дека претходно екс премиерот Заев јавно најави дека хотелот ќе биде легализиран.
Повеќе детали на https://ohrid1.com/archives/80030
