Владејачката артија експресно реагираше на критиките упатени од екс-претседателите Бранко Црвенковски и Ѓорѓе Иванов кои вчера изнесоа свое гледање на ситуацијата во Македонија и кои не штедеа критики за она што се случува во земјава на внатрешен и на надворешен план.
Во партиското соопштение лиферувано од Бихаќка се вели дека не било чесно ниту кон граѓаните ниту кон државата „поранешни претседатели од времето на транзицијата и режимот зборуваат за криминал и корупција, а не покажале никакви чекори против корупцијата во времето кога требало да му служат на народот.
„Денеска јавноста сведочеше едно пропагандно однесување на поранешни претседатели на државата.
Договорот од Преспа, Договорот за добрососедство со Бугарија и Рамковниот договор се најважните договори кои ја вратија во живот македонската интеграција, ги потврдија и зацврстија македонскиот идентитет и македонскиот јазик.
Македонската држава живее и ќе живее и нема да умира на рати, а ако тоа некој го посакува му порачуваме да мисли пред да дејствува, пред се заради нашиот народ и заради иднината на сите наши деца.
Граѓаните со својот глас и порано, и денес и во иднина прецизно го покажуваат патот кој се развива Македонија“, се наведува во партиското соопштение.
