Сакаме да живееме, рекоа болните од цистична фиброза кои со плач протестираа за терапија

Доста е со преговори, си играте со животот на пациентите. Нека излезе министерот со решение и да ни го обезбеди лекот. Ова се само дел од апелите од пациентите со цистична фиброза кои револтирани излегоа пред министерството за здравство, зашто државата останува глува на нивните барања.  

Луѓето кои биледуваат од цистична фиброза велат дека до овој момент, и покрај ветувањата од Министерството за здравство, Фондот и Одделите каде се лекуваат пациентите, нема поместување во третманот на болеста кон подобро, а здравствената состојба на секој од нив се влошува. Докторите се надеваат дека државата ќе најде начин да им се помогне на овие луѓе и конечно да се обезбеди лекот кој живот значи.

Станавме маргинализирана група на млади луѓе кои се туркаат кон пропаст, надлежните се јаки само на зборови, а не за решавање на нашите проблеми, реагираат од Асоцијацијата за цистична фиброза.

Асоцијацијата за цистична фиброза водеше активна кампања за да ги поттикне надлежните институции за воведување на модулаторна терапија за сите пациенти. Здравјето и животот на овие млади луѓе се нешто на кое не смее да се става цена и не смее да се игнорира, велат пациентите, зашто тие имаат право на лекот, а на државата е обврска да го обезбеди.