Москва соопшти дека останува на жителите на регионот Херсон во јужна Украина да одлучат дали сакаат да побараат да станат дел од Русија, откако таква идеја искажа висок функционер во областа контролирана од Русија.
„Народот на Херсонската област мора сам да одлучи дали такво барање треба да се поднесе или не и ова прашање треба да го испитаат правни експерти“, изјави портпаролот на Кремљ, Дмитриј Песков. „Таква далекусежна одлука мора да има јасна правна основа и да биде апсолутно легитимна, како што беше со Крим“.
На прашањето дали мислел на референдум, Песков одговори: „Не кажав ништо за референдум“.
Руските трупи го зазедоа Херсон на почетокот на март и го окупираа целиот регион, кој се граничи со Крим. Кирил Стремусов, заменик-шеф на администрацијата формирана под руска контрола, рече дека новите власти планираат да побараат од претседателот Владимир Путин официјално да го направи регионот „целосно дел од Русија“.
Стремусов го посочи Крим, кој гласаше за приклучување кон Русија веднаш по државниот удар во Киев во 2014 година. Тој рече дека до крајот на годинава ќе се подготват правни документи, по што ќе биде донесена конечната одлука.
„Во меѓувреме, планираме регионот Херсон да биде управуван со актите на воено-цивилната администрација“, рече Стремусов.
Шефот на администрацијата, Владимир Салдо, во понеделникот рече дека „нема официјални разговори или планови“ за приклучување кон Русија. Сепак, тој рече дека по негово мислење регионот еден ден ќе стане дел од Русија.
Украина ги смета новите власти во Херсон за нелегитимни. Претседателот Володимир Зеленски во април изјави дека Киев ќе се откаже од мировните преговори доколку Русија организира „псевдореферендум“ на териториите што ги контролира.
