Инспектори на американското Министерство за правда пронајдоа уште шест доверливи документи во домот на американскиот претседател Џо Бајден, објави во саботата адвокатот на Бајден.
Некои од документите се од периодот на мандатите на Бајден во Сенатот од 1973 до 2009 година, а други се од времето кога тој беше потпретседател на Барак Обама, изјави адвокатот Боб Бауер.
Самиот претседател му понудил на Министерството за правда да ја пребара секоја соба во неговиот дом во Делавер, рече тој. Ниту Бајден ниту неговата сопруга Џил не присуствуваа на претресот, дознава Би-Би-Си.
Инспекторите имаа целосен пристап до целата куќа на Бајден, а претресот траеше 12 часа и 45 минути.
Претресот доаѓа во континуитет откако во ноември беа пронајдени повеќе доверливи документи во неговата приватна канцеларија што тој ја чуваше во Вашингтон по завршувањето на неговиот мандат како потпретседател. Втората група записи беше пронајдена на 20 декември во гаражата во неговиот дом во Вилмингтон, додека друг документ беше пронајден во просторот за складирање во куќата на 12 јануари, рекоа неговите адвокати.
Од американските претседатели и потпретседателите се бара да ги вратат владините документи во националните архиви по завршувањето на нивниот мандат.
Под посебна истрага е и поранешниот претседател Доналд Трамп, кој однесе стотици доверливи документи од Белата куќа во својата резиденција на Флорида…
