Откако добил можност да магистрира на Универзитетот Утрехт во Холандија, дипломираниот правник, Петар Барлаковски побарал поддршка од Министерството за образование бидејќи школувањето и престојот во Холандија не може да си ги дозволи.
Тој ги исполнувал условите од конкурсот, на кој кандидатите за државна стипендија е потребно да имаат завршено прв циклус студии, нивниот просек да е над 8,50 и да се примени на универзитет рангиран меѓу првите 10 во светот според Шангајската листа.
Но тој е одбиен, бидејќи имал 180, а со едногодишните мастер студии од Утрехт ќе имал вкупно 240 кредити.
„Според нашиот систем, магистер е лице со образование кое обезбедува 300 кредити и нема да може да се спроведе постапка за нострификација на дипломата“, велат од МОН, пренесува „Сител“.
Барлаковски запишал магистерски студии и на правниот факултет во Скопје, но комисијата тоа не го зела во предвид, поради што ќе се жали на одлуката од Министерството за образование.
