Потерница и по Грк во врска со убиството на навивачот на АЕК

Грчката полиција се уште се обидува да открие кој го уби 29-годишниот навивач на АЕК Михалис Кацурис за време на хулиганските немири кои се случија во Атина пред повеќе од една недела.

Досега во врска со убиство се приведени 105 лица…

Како што објави грчкиот портал Стар, по уште неколку хрватски и грчки хулигани ќе бидат распишани потерници, бидејќи е познато дека не се уапсени сите кои учествувале во нередите што се случија на 7 август. Според Стар, веќе е распишана потерница по грчкиот обвинет со иницијали А.Д.

чија вмешаност во немирите произлегува од неговите објави на социјалните мрежи, каде што тврди дека учествувал во инцидентите и дека властите трагаат по него.

Грчките медиуми пишуваат дека денеска се очекува да бидат распишани потерници за неколку Хрвати кои биле идентификувани преку возилата што ги запленила полицијата. Како што пренесува Стар, се работи за 4 до 5 нови потерници.

Надлежните, пишува Стар, ќе се обидат да утврдат и кои се луѓето од Грција кои ги пречекале и ги „вооружиле“ хрватските хулигани.

Грчкиот портал Прототема вчера објави снимки од последните моменти на убиениот навивач на АЕК, Михалис Кацурис. Тие пишуваат дека полицијата има неколку видеа кои ги анализира, а преку кои се обидува да открие кој и како го убил 29-годишниот Грк.