Некогашниот претседател на Собранието, Тито Петковски, ја коментираше изјавата на поранешната шефица на бугарската дипломатија Екатерина Захариева дека промената на Уставот на Македонија не е голема работа, бидејќи Бугарите биле дел од реалноста во земјата и тоа морало да се прифати.
„Ако менувањето на нашиот Устав е толку мала и едноставна работа, тогаш зошто менувањето на бугарскиот Устав и внесувањето на Македонците во него, што е дел од реалноста во Република Бугарија, е толку тешка и сложена работа? Зарем европските вредности не се граѓански и етнички права и слободи?“, прашува Петковски.
„Бугарија има обврска според пресудата на Меѓународниот суд за човекови права, повторена по 15. пат, да ги признае правата на Македонците во Бугарија и слободата на политичко организирање. Зошто Бугарија како членка на ЕУ не ги признава и не ги спроведува одлуките на Меѓународниот суд? Дали е тоа правна и демократска држава по европски стандарди и критериуми?“, додава основачот и експретседател на НСДП.
