Претседателот Стево Пендаровски му сврте грб на Зоран Заев, кој како лидер на СДСМ го кандидира за шеф на државата на изборите во 2019 година, а кој бараше и издејствува бришење на описот „бугарски фашистички окупатор“ на дел од спомениците од Втората светска војна.
Пендаровски денеска положи цвеќе и се поклони на споменикот на 12. убиени младинци од Ваташа од бугарската војска и полициски одреди на 16 јуни 1943 година.
„Васил Хаџи-Јорданов, Ферчо Поп Ѓорѓиев, Диме Чекоров, Ванчо Гурев, Ристо Ѓондев, Блаже Ицев, Герасим Матаков, Пане Џунов, Пане Мешков, Данко Дафков, Илчо Димов и Перо Видев – сите на возраст од 15-27 години беа убиени од бугарскиот фашистички окупатор на 16 јуни 1943. Слава им!“, напиша Пендаровски на Твитер во пресрет на 80-годишнината од масакрот врз младинците за кои во извештајот на Главниот штаб на Народноослободителната војска на Македонија од септември 1943 година пишува: „Младинците се изрешетани од куршуми од митралези, па потоа се избодени со бајонети. На некои им се исечени рацете и извадени очите и притоа сите биле ограбени“.
