Македонскиот фудбалски репрезентативец Бојан Миовски фантастично го почна четиригодишниот договор со шкотскиот премиерлигаш Абердин, за кој во првите пет кола постигна пет гола и е прв стрелец во лигата!
Напаѓачот со шест настапи и еден погодок за Македонија во последната рунда од шкотското првенство беше двоен стрелец во триумфот на Абердин од 5:0 дома против Ливингстон, отворајќи го резултатот од пенал во 41. минута и зголемувајќи на 4:0 во 63. минута.
Претходно 23-годишниот штипјанец двапати стрелаше прецизно и против Сент Мирен во победата од 4:1 во второто коло, а еднаш погоди и во поразот од 3:2 од Мадервел во третиот круг од шампионатот.
Миовски постигна гол и во Лига купот во своето деби за Абердин, кој тогаш славеше со 3:0 против Раит.
Македонскиот центарфор во шкотскиот тим премина на 1 јули од унгарски МТК Будимпешта и потпиша договор до 31 мај 2026 година.
