Одговарајќи на новинарско прашање за неговиот тридневен одмор во Дубаи, вицепремиерот за борба против корупција Љупчо Николовски вели дека 16 часа дневно работел за граѓаните и за државата и дека има право три дена одмор да ѝ посвети на сопругата.
„Љупчо Николовски, како било кој друг граѓанин има право на одмор законски како што го следува и тоа што ми следува законски нема да дозволам никој да ми го попречи. Три дена одмор на 16 часа работа за граѓаните и за државата, чесно, искрено и одговорно, имам право да ги посветам на сопругата. Можеби контекстот, од оваа временска дистанца е направена грешка од наша страна што е избран Дубаи. Но, Љупчо Николовски ниту се вакцинирал, ниту правел бизнис, туку се бори против криминалот. Свесен сум дека вакви удари ќе има, но нема да ме поколебаат“, кажа Николовски.
