Жири од 92 члена меѓу десет номинирани кандидатки ја избра Македонката Љупка Вртева за инженерка на годината 2023 во Словенија.
Лауреатката на шестото издание на престижниот избор е магистер по машинство, развоен инженер од областа на затоплувањето, вентилацијата и ладењето на згради и проект-менаџер на соларна централа во компанијата „Петрол“.
„Таа уште како мала создавала многу, но пред сè сакала да ја трансформира својата имагинација во нешто видливо и опипливо“, пишуваат организаторите за добитникот на наградата.
Самата Вртева вели дека токму нејзината имагинација ја довела на патот на инженерството. По завршувањето на средното образование во Македонија, дипломирала и магистрирала на Машинскиот факултет на Универзитетот во Љубљана, а во 2019 година ја завршила меѓународната образовна програма Европски енергетски менаџер – ЕУРЕМ на Институтот „Јожеф Штефан“. Има развиено уникатна компјутерска програма од областа на механичката вентилација на зграда, а сега се занимава со дизајнирање на нови, поефикасни енергетски системи.
Вртева е горда на нејзиниот успех и храброст да стане инженер.
„Имам можност да ја споделам мојата приказна со млади девојки. Секој е способен да ги следи своите желби и ќе дојде момент во животот кога ќе бидат благодарни и горди на себе што имале храброст да ја изберат инженерската професија“.
Таа вели дека знаењето е најмоќната алатка и ги советува девојките: „Секој може да направи сè и секој има крилја, треба само да полета“.
Изборот покренат по иницијатива на „Сименс Словенија“ е дел од иницијативата „Ние ќе бидеме инженерки и инженери!“ и годинава се одржа шеста година по ред, во коорганизација на списанието IRT3000 и компанијата Mediade со партнерите-учесници. Од минатата година, по словенечкиот пример, инженерка на годината се избира и во Хрватска, и во Србија.
