Минимална според резултатот, но голема победа за самодоверба буквално извојува машката одбојкарска репрезентација на Македонија против Хрватска во Европската златна лига, добивајќи ја драмата од 131 минута со 3:2, и тоа откако во петтиот сет беше 14-14 и гостите беа на сервис!
Тогаш на сцената стапија Никола Ѓорѓиев и Владо Милев, кои ги обезбедија последните два поена за конечни 16-14 и ерупција од одушевување кај триилјадната публика во арената „Борис Трајковски“.
Избраниците на селекторот Јошко Миленковски си играа со нервите на навивачите и во претходните два сета, кои „коцкестите“ ги добија со 25-22 и 31-29, а посебно стресен се покажа четвртиот, во кој „црвено-жолтите“ со натчовечки напори се враќаа по 3-9 и 13-19, за на крајот да не искористат три меч-топки!
А сè наведуваше на помислата дека лесно ќе биде освоен целиот плен по добиените први два сета со 25-17 и 25-22 и водството од 9-6 и 16-14 во третиот.
Во другиот натпревар од групата Б лидерот Украина славеше со максимални 3:0 и во Белгија и води во групата Б со 9 бода, пред Македонија со 5, Белгијците имаат 4 и Хрватите 1.
На завршниот турнир одат победниците на трите групи со по четири селекции, како и најдобриот второпласиран тим.
