Со игра како по ноти во второто полувреме, откако првото го доби со 12:10, машката ракометна репрезентација на Македонија до 19 години ја „прегази“ Црна Гора со 29:20 во второто коло на 10. Светско првенство во Хрватска и си ја отвори вратата за главната фаза на шампионатот.
За тоа на избраниците на селекторот Радослав Стојановиќ ќе им биде доволна каква било победа утре од 17:30 часот против дебитантот и аутсајдер во групата Ф, Грузија, денеска убедливо поразена и од Норвешка со 38:24.
Норвежаните водат во групата со 4 бода, пред Македонија и Црна Гора со по 2 и Грузија без бодови.
Предводени од голманот Давид Брестовац, чии 13 одбрани, од кои 8 во првиот дел, му го донесоа признанието за играч на натпреварот, „црвено-жолтите“ во вторите 30 минути се ослободија од грчот и ја наполнија црногорската мрежа, забележувајќи ја првата победа на мундијалот.
На феноменалните 46 проценти успешни интервенции на Брестовац во последната третина од мечот одговори Иван Галевски со 5/9 за ефект од 56 отсто, на кои додаде и еден постигнат гол!
Меѓу дури 14 стрелци во македонскиот тим со по 3/4 се издвоија Ненад Белистојановски, Славчо Шулески и Томислав Димковски, а по 3/5 имаа Марио Стојановски и Самоил Ристевски.
Линк од целиот натпревар меѓу Македонија и Црна Гора:
https://www.youtube.com/live/X8A8pxvhrLo?feature=share
