Македонија издржа 19 минути против Норвешка на стартот од СП во ракомет

Шестата селекција на претходниот мундијал за ракометари Норвешка беше пресилна за Македонија на стартот од 28. Светско првенство во Полска и во Шведска, од која „црвено-жолтите“ загубија со 39:27 во Краков.

Избраниците на селекторот Кирил Лазаров беа рамноправни до 19. минута, кога на семафорот во „Таурон арена“ стоеше 9:9, но исклучувањето на десниот бек Мартин Серафимов потоа планетарниот вицешампион од 2017 и 2019 година го казни со три врзани кола и уште на паузата го навести триумфот со водството од 18:11.


Подмладениот македонски состав во завршницатa намали на 30:24, пред да се распадне во финишот и да дозволи (пре)убедлив пораз.

Како и во подготовките, одбраната повторно не беше на висината на задачата, а во нападот левиот бек Филип Талески со 7/11 беше најефикасен на средбата, левото крило Дејан Манасков имаше ефект 5/8, а пикерот Костадин Петров пријатно изненади со реализацијата на сите четири обиди.

Пласманот меѓу првите три тима во групата Ф што одат во следната фаза на шампионатот останува да се бара в недела од 18 часот против Холандија, која славеше со 29:19 против Аргентина, последниот ривал на Македонија во прелиминарната фаза.