ЕУ и НАТО се обидуваат да ги претворат Црна Гора и Северна Македонија во „алатка во антируската игра“, изјавил рускиот министер за надворешни работи Сергеј Лавров во интервју објавено на веб-страницата на Министерството за надворешни работи.
„Сега има впечатлива промена помеѓу она што Црногорците и Македонците го чувствуваат за Русија и она што нивните политичари се принудени од Брисел, ЕУ и НАТО да го прават. Тоа е истото што тие се обидоа да го направат со Украина и со голем број други источноевропски земји“, истакнал Лавров како што преенесува Њуз.бг.
Според него, Македонија стана Северна Македонија за да влезе во ЕУ. Но, тоа не беше прифатено таму, и наместо тоа беше вовлечена во НАТО, „почна да разгорува русофобични чувства, агресивна политика“ против Москва, рекол министерот.
На Црна Гора и беше ветено членство во Европската унија, но пред тоа „тие им рекоа дека е неопходно да се приклучи на НАТО, да се приклучи на санкциите, да заземе став кој е отворено антируски“, додаде шефот на руската дипломатија.
На почетокот на јуни, Црна Гора, Северна Македонија и Бугарија одбија да го пропуштат авионот на Лавров кога министерот требаше да ја посети Србија. Тој го нарече одбивањето на овие земји „незамисливо“ и срамно.
Според него, Србија, која е суверена држава, е лишена од правото да води надворешна политика кон Русија. Поради тоа, посетата на Лавров на Србија не се одржа според планираното.
