Јоска, партизанот што Заев го стори терорист против бугарска администрација

Морам да признаам дека не сум чепкала многу по семејните корени, но, денешниот настап на премиерот Заев, за првпат ме испровоцира до ниво на бес.

Ова е Јоска Јорданоски (1921-1942), брат на мојот дедо Борка Јорданоски.
Јоска (чие име го носи татко ми) е еден од седумте први прилепски партизани, кои на 12 септември 1941 год., во месноста “Бидимаш” на Селечка планина, ја формираат првата партизанска чета.

Била составена од борците: Илија Игески-Цветан, Трајко Бошкоски-Тарцан-Илинденски, Борка Велески -Горанов, Лазо Филипоски-Лавски, Ѓорe Секулов Велкоски–Стрелката и Киро Крстески-Платник.

На 17 октомври 1941 год. учествува во формирањето на Првиот прилепски партизански одред „Гоце Делчев“.

На 22 април 1942 год. учествува во формирањето на битолскиот партизански одред „Пелистер“, но веќе на 3 мај 1942 год. одредот во близина на Битолското село Орехово бил опколен од многубројна БУГАРСКА војска и полиција.

Во повеќечасовната нерамна борба Јоска загинал погоден од непријателски куршум во главата. Закопан е заедно со неговата соборка Елпида Караманди.

И никаков Заев не може да го порекне тоа. Никогаш.

Мери Јордановска
Новинар