Индија ќе стане најнаселената земја во светот до 14 април, достигнувајќи 1,43 милијарди жители и престигнувајќи ја Кина порано од очекуваното, според податоците на Обединетите нации.
Индиското население, во моментов над 1,4 милијарди, се очекува да продолжи да расте до 1,7 милијарди во 2064 година пред да почне да опаѓа.
ОН постојано ја поместуваа својата проценка за тоа кога Индија ќе го престигне северниот сосед по големина на населението. Неодамна, во 2019 година, тоа не се очекуваше да се случи до 2027 година. Тоа ќе биде првпат во последните 300 години Кина да не е лидер во глобалната популација.
Додека Индија расте со стапка од 2 проценти од втората половина на 20 век, стапката на раст на Кина се намали за речиси половина на 1,1 отсто помеѓу 1973 и 1983 година и никогаш не закрепна, во голем дел поради владините политики кои ги ограничуваат семејствата на едно дете. Кинезите сега се слободни да имаат колку што сакаат деца, но просечната големина на семејството останува на 1,3.
Индија ќе ја надмине Кина како најнаселена земја не поради тоа што нејзината стапка на наталитет расте – таа всушност се намали од просечни 5,7 раѓања по жена во 1950 година на само две раѓања по жена во 2022 година – туку поради тоа што опаѓа побавно од таа на Кина.
Расте и економијата на Индија. Неодамна го надмина својот поранешен колонизатор Велика Британија, станувајќи петта економија по големина во светот. Се очекува до 2029 година да стане трета, според Државната банка на Индија. Исто така, се предвидува дека земјата ќе обезбеди над една шестина од предвиденото зголемување на работоспособното население во светот од сега до 2050 година.
