Талибанските власти во Авганистан бараат ослободување на милијарди долари од резервите на централната банка, бидејќи земјата погодена од суша се соочува со монетарна криза, масовно гладување и нова миграциска криза, пишува Ројтерс.
Авганистан депонираше милијарди долари средства во странство во Федералните резерви на САД и другите централни банки во Европа, но тие пари беа замрзнати откако исламистичките талибанци ја соборија владата поддржана од Западот во август.
„Парите ѝ припаѓаат на авганистанската нација. Само дајте ни ги нашите сопствени пари“, инсистираше портпаролот на Министерството за финансии Ахмад Вали Хакмал: „Замрзнувањето на тие пари е неетичко и спротивно на сите меѓународни закони и вредности“.
„Ситуацијата е очајна и количината на пари се намалува“, изјави за Ројтерс Шах Мехраби, член на одборот на авганистанската централна банка, додавајќи: „Има доволно…да продолжи Авганистан до крајот на годината. Европа ќе биде најтешко погодено ако Авганистан не добие пристап до овие пари“.
„Ќе имате двоен удар … Луѓето ќе бидат очајни. Ќе одат во Европа“, додаде тој.
Авганистан се соочува со колапс во својата кревка економија. Заминувањето на силите предводени од САД и многу меѓународни донатори ја остави земјата без грантови, кои финансираат три четвртини од јавната потрошувачка.
Мехраби се надева дека иако САД неодамна соопштија дека нема да го ослободат својот лавовски дел од околу 9 милијарди долари, европските земји ќе можат. Тој појасни дека Германија има половина милијарда долари авганистански пари и дека таа и другите европски земји требало да ги обезбедат овие средства.
Мехраби истакна дека на Авганистан му требаат 150 милиони долари секој месец за да „спречи неизбежна криза“ за одржување на локалната валута и стабилни цени, додавајќи дека секој трансфер може да го следи ревизор.
Талибанците ја презедоа власта во Авганистан во август, откако САД ги повлекоа своите трупи, речиси 20 години откако исламистите беа соборени од силите предводени од САД по нападите на 11 септември 2001 година.
