„Треба да се најде место во државните институции за 1.300 лица кои се сега вработени во Министерството за политички систем кое го водам“, изјави вицепремиерот и министер за политички систем Артан Груби.
Тој рече дека во соработка со Јетон Шаќири, министерот за информатичко општество и администрација, во најкус можен рок ќе обезбедат распоредување на сите вработени во согласност со Охридскиот рамковен договор во државните институции. Станува збор за 1.300 вработени во неговото министерство, односно претходниот Секретаријат за политички систем, кои земаат плата, а не одат на работа.
„Приоритет ќе ни биде систематизацијата на 1.300 вработени во ова министерство на кои треба да им најдеме место во државните институции низ целата држава. Ќе ги признаеме факултетските дипломи на сите административци и ќе ги мотивираме да се надградат себе си и својата иднина да ја гледаат да ја градат во нашата земја“, кажа Груби на денешната прес-конференција во Владата.
