Американскиот весник „Њујорк тајмс“ во својот денешен број објави подолга анализа преку репортажа од Гевгелија за прашањето за името на Македонија, со акцент на македонската вистина, која ја бранат историчарот Милан Бошкоски и археологот Емил Сламков.
„Милан Бошкоски, професор на Институт за национална историја во Скопје, рече дека за да се разбере спорот најдобро е да се почне со периодот кога Османлиите владееле со оваа територија – околу 500 години, до крајот на 20 век. Истражувајќи книга за историјата на името Македонија, тој рече дека нашол документ од 1902 година, кој ја забранува употребата на терминот Македонец. Во тоа време османлиските владетели се борат со националисти и тие се загрижени дека името ќе им даде на бунтовниците чувство на идентитет.
‘Тоа е приказна што се повторува’, рече тој. ‘Но, и атомска бомба да го уништи ова место, ние сè уште ќе се нарекуваме Македонци’“, пишува „Њујорк тајмс“ во статијата насловена „Што има во името? За Македонија, клучот за мирот и безбедноста“.
Археологот со кој го почнува текстот престижниот дневен лист од „големото јаболко“, пак, е отворен за компромис, но има црвена линија.
„Дури и г-динот Сламков, жестоко горд на своето наследство, е подготвен да се најде понатамошен компромис. До одредена точка. Нему не му е гајле за тоа какво име ќе договорат политичарите за употреба надвор од земјата – сè додека го вклучува зборот Македонија.
Стоејќи покрај урнатините на една од најзначајните ископини во земјата, неколку милји од границата со Грција, каде што неговиот тим пронајде монети со печат од Александар Велики, тој рече дека, како и артефактите во земјата, некои работи се токму тоа што се.
‘Никој’, рече тој, ‘не може да ви каже како да се наречете во вашиот дом’“, стои во делот за кураторот во Национална установа „Музеј Гевгелија“.
