Андреас Трајковски го освои осмото место во скок во далечина на Европското првенство во атлетика во сала што се одржува од 6 до 9 март во Апелдорн, Холандија.
Првиот Македонец што се изборил и настапил во финале на големо атлетско натпреварување прескокна 7,65 метри во третата серија, откако во првата имаше 7,59 м, во четвртата 7,63 м, а во останатите три направи престап во својот дебитантски настап на ЕП во сала.
Најдобриот скок во финалето на единствениот македонски претставник на шампионатот е покус за 20 сантиметри од тој што вчера му донесе седмо место во квалификациите, нов личен и државен рекорд на Македонија, но и со тие 7,85 м денеска немаше да биде подобро пласиран.
Сепак, на 31-годишниот Андреас, роден во Копенхаген, чиј татко и тренер Христијан Трајковски е некогашен шампион на Данска на 100 м и на 200 м, му се исполни желбата кога на 8 февруари 2022 година го замени данскиот со македонски дрес да направи нешто големо за Македонија.
