Трамп: Палестинците да се раселат од Појасот Газа, САД ќе ја претворат во „Ривиера на Блискиот Исток“

Американскиот претседател Доналд Трамп изјави дека САД ќе го преземат разурнатиот од војна Појасот Газа и ќе го развијат економски откако Палестинците ќе бидат преселени, во потег што целосно ќе ја смени децениската политика на САД кон израелско-палестинскиот конфликт.

Трамп го претстави својот изненадувачки план , без да открива детали, на заедничката прес-конференција со израелскиот премиер Бенјамин Нетанјаху.

„Тоа е чисто место за уривање“, рече Трамп непосредно пред пристигнувањето на Нетанјаху.

Ако можеме да го најдеме вистинското парче земја или повеќе парчиња земја и да им изградиме навистина убави места со многу пари во областа, тоа е сигурно.

Мислам дека тоа би било многу подобро отколку тие да се вратат во Газа. Не знам како тие (Палестинците) сакаат да останат, рече Трамп на прашањето за реакцијата на палестинските и арапските лидери на неговиот предлог.

Планот на Трамп би вклучувал принудно преселување на Палестинците во земји како Јордан и Египет.

Тој додаде дека САД би можеле да ја обноват палестинската територија.

Трамп предложи САД да воспостават контрола над разурнатиот од војна Појасот Газа, да го развијат економски и да го претворат во „Ривиера на Блискиот Исток“.

Запрашан кој ќе живее таму, Трамп рече дека тоа може да стане дом на „луѓето од светот“.

„Ако е потребно… ќе воспоставиме контрола врз ова парче (земјиште – уред.), ќе го развиеме, ќе создадеме илјадници и илјадници работни места и тоа ќе биде нешто со што целиот Блиски Исток може да биде многу горд“, додаде Трамп.

Трамп претходно рече дека жителите на Газа не треба да се враќаат дома и дека треба да бидат „преместени“ во соседните земји – предлог претходно отфрлен од земјите во регионот.

Израелскиот премиер Бенјамин Нетанјаху, кој е првиот странски лидер што го посети Вашингтон во вториот мандат на Трамп, го пофали претседателот за неговата способност да „размислува надвор од рамката“ и го нарече Трамп „најголемиот пријател што Израел некогаш го имал во Белата куќа“.