Министерот за внатрешни работи Панче Тошковски денеска учествуваше на традиционалниот „Охридски безбедносен форум“ во организација на дипломираните студенти на Маршаловиот центар за безбедносни студии, а во соработка со Европскиот центар за безбедносни студии и амбасадите на САД и Германија. Тој истакна во обраќањето дека заедничките евроатлански вредности се основен двигател на земјите од Западниот Балкан во надминувањето на своите разлики и продолжувањето на патот кон евроатланска интеграција.
„Како членка на НАТО, безбедноста и стабилноста значително се унапредија за нашата земја и за целиот регион. Многу потесно соработуваме со сите наши соседи, кои се членки на Алијансата и заеднички придонесуваме кон нејзиното функционирање и развој.“ – нагласи министерот Тошковски.
Тој ги дефинира главните безбедносни закани, трендови и предизвици, со кои се соочува Македонија: организираниот криминал и корупција, илегалната миграција, трговијата со луѓе, шверцот на мигранти…
„Илегалната миграција и различните форми на прекуграничен криминал се дел од нашите главни предизвици како министерство. Тука се и хибридните закани, кои се регионални и глобални и преку неконвенционални акции, психолошки напади и сајбер-напади, шпионажа, ширење дезинформации, чија цел е создавање претстава на несигурност и недоверба кај граѓаните во демократските институции. Имавме и хибридни напади во 2022 и 2023 година на територија на целата држава.“ – подвлече Тошковски.
