Со новиот модел на достава на личните карти на граѓаните во Скопје доставени се четири и пол пати повеќе лични карти, објави денеска техничкиот министер за внатрешни работи Панче Тошковски.
,,Пред две недели го укинавме претходно воспоставеното решение за достава на лични карти според кое полициски службеници ги доставуваа личните карти на домашна адреса на граѓаните и воведовме нов механизам за достава така што граѓаните можат во било кое време да ја подигнат својата лична карта во подрачната полициска станица според местото на живеење.
Во тој контекст за само две недели доставени се вкупно 12476 лични карти, односно во просек по 891 дневно, што е четири и пол пати повеќе во однос на претходно кога за период од 50 дена (18.01.2024 – 09.03.2024г.) биле доставени 10100 лични карти, односно 202 дневно.
Овие бројки покажуваат дека новата мерка која ја донесовме пред две недели, а која се темелеше врз основа на претходно направени анализи е исправна и дава одлични резултати”, објави денеска Тошковски кој за нешто повеќе од еден месец успеа да ги регулира проблемите при аплицирање и издавање на пасоши и лични карти по што веќе нема метеж пред единиците на МВР и се издаваат двојно повеќе лични документи од времето пред тој да дојде на чело на МВР.
