Доналд Трамп Јуниор ќе го посети Гренланд , посета која коинцидира со сугестиите на неговиот татко дека данската територија треба да биде дел од САД.
Трамп сака да го купи Гренланд
Најголемиот остров на Земјата е данска територија. По референдумот во 2008 г ѝ беше дадена проширена автономија – Данска моментално ја контролира само надворешната политика и одбраната.
Новоизбраниот претседател Доналд Трамп ја потврди посетата на неговиот син на неговата платформа Truth Social.
„Мојот син, Дон Џуниор, и разни претставници, ќе патуваат таму за да ги посетат некои од најпрекрасните области и знаменитости“, објави тој доцна во понеделникот.
„Гренланд е неверојатно место, а луѓето ќе имаат огромна корист ако и кога стане дел од нашата нација“, додаде пренесува Дојче веле.
Трамп Јуниор ќе снима видео содржини за подкаст, изјави за Асошиетед прес лице запознаено со плановите.
Тој е гласен поддржувач на политиката на неговиот татко, но рече дека нема да се приклучи на новата администрација.
Данското Министерство за надворешни работи соопшти дека е запознаено за посетата.
„Бидејќи тоа не е официјална американска посета, Министерството за надворешни работи на Данска нема дополнителни коментари“, соопшти Министерството.
Гренланд се наоѓа помеѓу Атлантскиот и Арктичкиот океан, а околу 80% од него е покриен со мраз. Во него се наоѓа голема американска воена база. Има свој парламент и влада, а оваа година треба да се одржат нови избори.
Ова не е првпат Трамп да изрази интерес за американска контрола врз Гренланд. Тој имаше слични тврдења уште во 2019 година.
„За целите на националната безбедност и слободата низ целиот свет, Соединетите Американски Држави чувствуваат дека сопственоста и контролата на Гренланд се апсолутна неопходност“, рече Трамп во декември 2024 година.
Како одговор, премиерот на Гренланд Муте Егеде рече: „Гренланд е наш. Ние не сме на продажба и никогаш нема да бидеме на продажба“.
Данска ќе ја засили одбраната на Гренланд по желбата на Трамп „да го купи“
