Новоизбраниот американски претседател Доналд Трамп размислува да го номинира Ричард Гренел, неговиот поранешен шеф на разузнавањето, за специјален пратеник за руско-украинскиот конфликт, тврдат четири извори запознаени со плановите за транзиција.
Гренел, кој беше амбасадор на Трамп во Германија и вршител на должноста директор на националното разузнавање за време на мандатот на Трамп од 2017 до 2021 година, ќе одигра клучна улога во напорите на Трамп да ја запре војната доколку биде избран за таа позиција.
Гренел се залагаше за создавање „автономни зони“ како средство за решавање конфликти. Тој исто така рече дека нема да биде за влез на Украина во НАТО во блиска иднина.
Доналд Трамп, кој ќе го преземе претседателството на 20 јануари, ја критикуваше силната поддршка на поранешниот претседател Џо Бајден за Киев и рече дека ќе бара што поскоро ставање крај на руската војна во Украина.
Во моментов САД немаат специјален пратеник посветен исклучиво на решавање на конфликтот меѓу Русија и Украина, но Трамп размислува да создаде таков, според четворица извори кои зборуваа под услов да останат анонимни за да разговараат за внатрешните размислувања.
Трамп на крајот може да одлучи да не избере специјален пратеник за конфликтот во Украина, иако сериозно ја разгледува можноста, велат изворите.
За време на предизборната кампања, Трамп вети брз крај на конфликтот, иако сè уште не откри како планира да го постигне тоа.
