Селекторот на машката ракометна репрезентација на Македонија, Кирил Лазаров, изрази задоволство од ждрепката за Светското првенство 2025, која за ривали на неговите избраници ги одреди Унгарија, Холандија и Гвинеја во групата во Вараждин.
„Од прв и втор шешир добивме доста квалитетни репрезентации. Секако дека можеше да добиеме уште поквалитетни противници, но треба да бидеме задоволни пред сè со фактот дека ќе играме во Хрватска, во Вараждин и ќе имаме огромна поддршка од нашите верни навивачи. Сите имаме добри спомени од Вараждин и се надевам дека повторно ќе биде така. Имаме доста време да се подготвиме квалитетно за Светското првенство“, изјави најдобриот македонски ракометар на сите времиња.
