Кина ги зголемува царините за американските стоки од 84 на 125 отсто од 12 април, објави Државниот совет на НР Кина, цитиран од Блумберг.
Ова доаѓа откако американскиот претседател Доналд Трамп вчера ги зголеми царините за Кина на 145%.
Од Пекинг предупредија дека „дури и ако САД продолжат да воведуваат повисоки царини, тоа повеќе нема да има економска смисла и ќе стане шега во историјата на светската економија“, се вели во соопштението, пренесе CNBC.
„Со царинските стапки на сегашното ниво, веќе нема пазар за американски стоки увезени во Кина“, се вели во соопштението, додавајќи дека „ако американската влада продолжи да ги зголемува тарифите за Кина, Пекинг ќе ги игнорира“.
Администрацијата на Трамп потврди за CNBC во четвртокот дека царинската стапка на САД за кинески увоз сега всушност изнесува 145%.
Надежите за договор меѓу САД и Кина за решавање на трговските тензии брзо избледеа бидејќи Пекинг возвраќа во последната недела со царински давачки за американските стоки и широки ограничувања за американските бизниси.
