Украинскиот претседател Володимир Зеленски изјави дека не мисли дека треба да му се извини на американскиот претседател Доналд Трамп по нивниот судир во Белата куќа во петокот, но нагласи и дека го почитува американскиот претседател.
Во интервју за Фокс њуз, на прашањето дали мисли дека должи извинување, Зеленски одговори:
„Не, го почитувам претседателот и го почитувам американскиот народ и (…) Мислам дека треба да бидеме многу отворени и многу искрени. Не сум сигурен дека направивме нешто погрешно“, објави агенцијата ДПА.
Украинскиот лидер оцени дека ваквиот исход од средбата „не е добар за ниту една страна“.
Тој исто така рече дека Трамп греши кога тврди дека никогаш нема да сака да потпише договор со рускиот лидер Владимир Путин, но предупреди и дека Украина мора да биде во силна позиција, пренесе Ројтерс.
Тој призна дека ќе и биде тешко на Украина да и се спротивстави на Русија без поддршка од САД и изрази уверување дека неговиот однос со Трамп може да се спаси.
Но, тој додаде дека посакува Трамп да биде „повеќе на наша страна“.
