Договорот за добрососедство со Македонија ќе оди на ратификација во Народното собрание на Бугарија следната недела, соопшти бугарската министерка за надворешни работи Екатерина Захариева.
„Го потпишавме договорот со Македонија и очекуваме тие да го ратификуваат. Беа во предизборна атмосфера. Ние ќе го внесеме сосем наскоро. Тој вторпат е во процедура на усогласување во министерствата. До следната седмица планираме да стигне пред Владата. Наредната недела ќе го внесеме за ратификација во Народното собрание и се надевам дека и тие ќе преминат кон ратификување, па да почнеме да го исполнуваме“, изјави шефицата на бугарската дипломатија пред пратениците од парламентарните комисии за надворешни работи и за европски прашања.
На дискусијата на тема „Европската интеграција, регионалната соработка и поврзаноста на Западен Балкан – придонес на бугарското претседателство“ Захариева повтори дека интеграцијата на соседните држави ќе биде приоритет на Бугарија кога ќе претседава со Советот на Европска унија во првата половина од наредната година.
