Американските обвинители го обвинија Хантер Бајден дека примал пари од романски олигарх за да „влијае врз американските владини агенции“.
Обвиненијата се дел од поголем случај против синот на претседателот, кој е обвинет за затајување данок од 1,4 милиони долари во периодот од 2016 до 2019 година, додека трошел милиони на луксузни автомобили и дрога.
Републиканците долго време го обвинуваат Хантер Бајден (54) за „трговија со влијание“, иако конгресните истраги допрва треба да утврдат каква било вина.
Судењето за затајување данок треба да започне во септември во Калифорнија. Хантер рече дека не е виновен.
Според судската пријава поднесена во средата до федералниот суд во Лос Анџелес, романскиот државјанин го ангажирал Хантер за правна работа во 2015 година, додека неговиот татко бил потпретседател на тогашниот претседател Барак Обама, пишува Би-Би-Си.
Поднесокот го идентификува романскиот бизнисмен само по неговите иницијали, Г.П., но американски медиуми објавија дека тоа е Габриел Поповичу, кој во тоа време се соочувал со обвиненија за корупција во Романија.
Обвинителите планираат да докажат дека Хантер Бајден и неговиот соработник „добиле компензација од странски државјанин кој се обидел да влијае на американската политика и јавното мислење“ и ги повикааа САД „да се занимаваат со романската истрага против Г.П.“.
Во поднесокот, исто така, се наведува дека Хантер и неговиот соработник „биле загрижени дека лобирањето може да има политички последици за таткото на обвинетиот“, Џо Бајден, па затоа сакале да ја прикријат „вистинската природа“ на договорот.
Обвинителите веруваат дека Хантер и двајца соработници ги поделиле трите милиони долари што ги добиле од Поповичу.
Во 2017 година, Поповичу беше осуден на седум години затвор за измама со недвижен имот.
